„დებატების წყალობით სოფლად მცხოვრებ ბავშვებსაც მიეცათ უნიკალური შესაძლებლობა საერთაშორისო ასპარეზზე გასულიყვნენ. დებატების კლუბში ჩართული მოსწავლეები ყოველთვის დიდ წარმატებას აღწევენ. სოფლად მცხოვრებ მოზარდებს საკუთარი თავის წარმოჩენა ნაკლებად ეხერხებათ, მორიდებულები არიან. დებატებმა ისინი თავდაჯერებულები და გახსნილები გახადა“, – როგორც კაჭრეთის საჯარო სკოლის დირექტორი ლელა ბაზერაშვილი ამბობს, დებატების კლუბმა საკმაოდ დიდი გამოცდილება მისცა როგორც პედაგოგებს, ისე მოსწავლეებს.

ლელა ბაზერაშვილმა განსაკუთრებით აღნიშნა მაჟორიტარი დეპუტატის, პარლამენტის დარგობრივი პოლიტიკისა და ეკონომიკური პოლიტიკის კომიტეტის თავმჯდომარე დავით სონღულაშვილის დიდი მხარდაჭერა კაჭრეთის სკოლისა და დებატების კლუბის მიმართ.

ლელა ბაზერაშვილი 7 წელია რაც კაჭრეთის საჯარო სკოლას ხელმძღვანელობს. სკოლას 100 წლის ისტორია აქვს. ის პირველად პატარა კერძო სახლში, შემდეგ ანდრონიკაშვილების სასახლეში ფუნქციონირებდა და მხოლოდ 1982 წელს გადავიდა ახალ შენობაში. სკოლა იმითაც გამოირჩევა რომ ყოველწლიურად რამდენიმე ოქროს მედალოსანი ამთავრებს სწავლას და კურსდამთავრებულების უმეტესობა მაღალი შეფასებებით ხდება წამყვანი უნივერსიტეტების სტუდენტი. ლელა ბაზერაშვილის თქმით, მოსწავლეების წარმატებებში სკოლასთან ერთად დიდი წვლილი დებატების კლუბს მოაქვს.

მოდებატეები ყოვლეკვირეული ტრენინგების შედეგად ეროვნულ თუ საერთაშორისო ტურნირებში მონაწილეობენ და წარმატებებსაც აღწევენ.

მარი ბეროშვილი 2 წლის წინ მოდებატეთა საუკეთესო ათეულში მოხვდა. გამორჩეული უნარების გამო საერთაშორისო ტურნირშიც ჩაერთო, რის გამოც 2 კვირა ავსტრიასა და სლოვაკეთს სტუმრობდა. დებატების კლუბში მიღებული გამოცდილება მისი სწავლის შედეგებზეც აისახა. მარი 100% გრანტით ჩაირიცხა უნივერსიტეტში და იქაც დამატებითი შიდა სტიპენდია მოიპოვა.

მისი მოსახელე მარიამ ბეროშვილი პანდემიური წლის საუკეთესო მოდებატეებში მოხვდა და ონლაინ ფორმატში საერთაშორისო ტურნირშიც ჩაერთო. მარიამიც 100% გრანტით გახდა სტუდენტი.

აუწონელია ის ღვაწლი, რაც ჩვენი მოდებატეების, ჩვენი სკოლის და მთლიანად მომავალი თაობის განვითარებაში შეიტანა ჩვენმა ერთ-ერთმა გამორჩეულმა პედაგოგმა, ლარისა ქიტოშვილმა, ვინც საფუძველი ჩაუყარა ჩვენი სკოლის დებატკლუბს და ვისი დამსახურებითაც ამდენს მიაღწიეს ჩვენმა მოსწავლეებმა.

 

ჩვენ ვცდილობთ, რომ არცერთი დებატების კლუბი არ დავტოვოთ უყურადღებოდ და ეტაპობრივად ვესტურმოთ თითოეულ მათგანს ადგილზე.

#დებატებიუკეთესიგანათლებისთვის

„გასულ წელს მხოლოდ ონლაინ შეხვედრები გვქონდა მთელი წლის განმავლობაში, იყო სირთულეები, კლუბის რამდენიმე წევრს კოვიდი შეხვდა, თუმცა მათი ინტერესი იმდენად დიდი იყო, რომ საავადმყოფოდან ერთვებოდნენ შეხვედრებს საკუთარი სურვილით“ – დებატკლუბის ხელმძღვანელი თბილისიდან, ეკატერინე სამხარაძე დებატების კლუბის წარმატებებზე საუბრობს.

 

“დებატების კლუბში მხოლოდ ფორმალური დებატების ტექნიკის სწავლების საშუალება კი არ არის, არამედ მასში ჩართული მოსწავლეებისთვის წარმატებული მომავლისკენ გადადგმული ერთი დიდი ნაბიჯია“, – ქ. თბილისის N216 საჯარო სკოლის ისტორიის მასწავლებელმა ეკატერინე სამხარაძემ ორი წლის წინ თავად მიიღო გადაწყვეტილება საქართველოს დებატებისა და განათლების ინსტიტუტს დაკავშირებოდა და სკოლაში სიახლის დანერგვით  თვითგანვითარებასთან ერთად მოსწავლეებისთვის ახალი ცოდნის და უნარების შეძენის შესაძლებლობა მიეცა. შედეგმაც არ დააყოვნა. „დებატების კლუბში აქტიური ჩართულობით მიღწეული წარმატება ყველა ჩემს მოსწავლეში დავინახეთ მეც და კოლეგებმაც. გარდა იმისა, რომ ფორმალური დებატების ტექნიკა ისწავლეს, გახდნენ თავდაჯერებული, აქტიური, გამოხატავენ მეტ ინტერესს და ერთვებიან სხვადასხვა პროექტებსა და აქტივობებში“,-აღნიშნა ეკატერინე სამხარაძემ.

ივ. ჯავახიშვილის სახელობის თბილისის სახელმწიფო უნივერსიტეტის ჰუმანიტარულ ფაკულტეტზე სწავლისას, პედაგოგიკის სწავლის კურსი გაიარა და სწორედ მას შემდეგ მიხვდა რომ ეს იყო მისი მომავალი პროფესიული არჩევანი. სკოლაში 2011 წლიდან მუშაობს. „ცოტა  მეგულება ამაზე უფრო დიდი, მნიშვნელოვანი და საპასუხისმგებლო საქმე, ვიდრე მასწავლებლობაა. დაეხმარო მოსწავლეს შეიძინოს ცოდნა და უნარები – ეს დიდი პასუხისმგებლობაა და მასწავლებლისგან მოითხოვს არასოდეს შეწყვიტოს თვითგანვითარებაზე ზრუნვა, ამასთან  შეძლოს მოსწავლის დაინტერესება მისთვის სიახლის შეთავაზებით“,- სწორედ ამიტომაც პირადი ინიციატივით და ძალიან დიდი ძალისხმევით, საკუთარი სკოლა ჩართო დებატების ორგანიზაციის ნოვატორულ პროექტში, როგორც თავად ამბობს, ისეთი იყო მისი მონადომება, რომ ორგანიზატორებიც კი გააკვირვა. მისივე თქმით, მან იცოდა, რომ დებატების ორგანიზაციის პროექტში მოსახვედრად, სკოლებს საკმაოდ დიდი და მყარი რეკომენდაციები სჭირდებოდათ და მხოლოდ შემდეგ მიეცემოდათ თუნდაც კონკურსში მონაწილეობის მიღების შესაძლებლობა, მას კი ისეთი დიდი ინტერესი და სურვილი ჰქონდა აქ მოხვედრის, რომ არა მარტო მთელი შემართებით მოიპოვა კონკურსში გავლის უფლება, წარამატებითაც გაიარა ის და დღეს უკვე საქართველოს დებატებისა და განათლების ინსტიტუტის მხარდაჭერით დებატების კლუბიც აქვს საკუთარ სკოლაში.

“მიუხედავად იმ გამოწვევებისა, რაც უდგას დღეს ჩვენს მცირეკონტიგენტიან სკოლას, სიახლეებისთვის ძალისხმევას მაინც არ ვიშურებთ” – ამბობს ეკა. “ყოველკვირეული შეხვედრები რეგულაციების დაცვით პირისპირ ტარდება. გასული წლის განმავლობაში ტრენინგები ონლაინ რეჟიმში მიმდინარეობდა,  იყო ბევრი სირთულე, მაგრამ საქართველოს დებატებისა და განათლების ინსტიტუტის წარმომადგენლების მუდმივი ჩართულობით, დაუზარელი გვერდში დგომით, გრძელვადიანი და საქმიანი თანამშრომლობით ყველაფერი დავძლიეთ”.

„ჩვენი სკოლა დებატების სწავლების უკვე მრავალ წელს ითვლის. ჯერ კიდევ თავის დროზე დებატების დანერგვა საგანმანათლებლო სივრცეში, მართლაც ძალიან პროგრესული და საინტერესო ნაბიჯი იყო. ეს იყო და არის სწავლება, რომელიც ანვითარებს მოსწავლეებში კრიტიკულ აზროვნებას, ლოგიკურ და არგუმენტირებულ მსჯელობას, ანვითარებს ყველა იმ უნარს, რაც ასეთი მნიშვნელოვანია თანამედროვე ადამიანისთვის“, – განაცხადა სკოლა „ჯეჯილი“-ს დირექტორმა ნინო ჩივაძემ. მანანა პარკაძის მიერ დაფუძნებული კერძო სკოლა პირველი იყო ქართულ საგანმანათლებლო სივრცეში, სადაც 90-იანი წლების ბოლოს პირველი დებატების კლუბი შეიქმნა.

 

1902 წელს გორის მერმა გრიგოლ ლოლაძემ ხელმოკლე ოჯახებისთვის დაწყებითი განათლების სკოლა როცა გახსნა, არც უფიქრია რომ 90 წლის შემდეგ ამ საქმეს უკვე მისი შვილიშვილი და შემდეგ შვილთაშვილი გააგრძელებდა და  საქართველოს დამოუკიდებლობის აღდგენის პირველივე წლებში სრულიად ახალი კონცეფციის საგანამანათლებლო კერას გახსნიდა. კერძო სკოლა “ჯეჯილი” პირველი მერცხალი იყო საქართველოს განათლების სექტორში. 90-იანი წლების დასაწყისში, როცა ჯერ კიდევ კანონიც კი არ არსებობდა კერძო სკოლების შესახებ, მანანა პარკაძემ  შვილიშვილის სასკოლო განათლების საკითხი გლობალურად გადაჭრა და სკოლა დააფუძნა.

„როდესაც მაშინდელ განათლების მინისტრს, გუჩა კვარაცხელიას სასკოლო კონცეფცია წარვუდგინე, ხელმოსაჭიდი დოკუმენტები მოითხოვა, მამაჩემის მიერ მუზეუმიდან გამოტანილი დოკუმენტები წარვადგინე. ისტორიული მასალები წინაპრების გრიგოლ ლოლაძის და დათა პარკაძის დამსახურებებს ასახავდა განათლების სისტემაში: როგორ შექმნეს სკოლა ხელმოკლე ოჯახებისთვის; როგორ მისცეს შესაძლებლობა მათ მიეღოთ დაწყებითი განათლება და ა.შ.“- აღნიშნა სკოლის დამფუძნებელმა მანანა პარკაძემ, რომელიც უკვე 80 წლისაა, თუმცა დღესაც გამოირჩევა ყველაზე თანამედროვე და ინვოაციური იდეებითა თუ შეფასებებით საგანმანათლებლო სექტორში.

„ვენდოთ მემკვიდრეობით გამოცდილებას“-მიუხედავად საკანონმდებლო ბაზის არქონისა, ეს რეზოლუცია  მაშინდელმა განათლების მინისტრმა გუჩა კვარაცხელიამ კერძო სკოლის იდეას სწორედ წინაპრების დიდი და კეთილი წამოწყების გამო დააწერა. მეოცე საუკუნის დასაწყისში გრიგოლ ლოლაძის სკოლაში საგანმანათლებლო საქმიანობას იაკობ გოგებაშვილი,  ნიკო ლომოური და ანდრია ყარაშვილი ეწეოდნენ. ამ დიდი სახელების გავლენა საუკუნის მერეც იგრძნობოდა საბჭოთა სკოლისგან აბსოლუტურად განსხვავებული მოდელის შექმნისას.

კერძო სკოლაში შექმნის დღიდან ყველა ის სიახლე და ნოვატორული იდეა იყო განხორციელებული, რაც ქართულ საგანმანათლებლო სისტემაში აქტუალური ათეული წლების მერე გახდა.

ასეთი ნოვაცია იყო „ჯეჯილისთვის“ დებატების კლუბის დანერგვაც. იდეა მანანა პარკაძეს მას შემდეგ გაუჩნდა, რაც ჯერ კიდევ 90-იანი წლების ბოლოს ერთ-ერთ ყველაზე მნიშნველოვან და სრულიად ახალ საერთაშორისო ტრენინგზე თინათინ ცერცვაძე გაიცნო და მისით ისე მოიხიბლა, რომ სკოლაში სამუშაოდ მიიწვია. დებატების კლუბის შექმნასთან ერთად, მალევე, სასკოლო საქმიანობაში დღევანდელობისთვის უკვე აუცილებელი პრაქტიკა დაინერგა, თინათინ ცერცვაძე სკოლის ფსიქოლოგიც გახდა.

„ჩვენს სკოლაში ძალიან ბევრი სიახლე გვქონდა. ის, რასაც ჩვენ ახლა რეფორმას ვეძახით, 30 წლის წინ მანანა პარკაძემ შემოიტანა პირველმა სკოლაში“-სკოლის ამჟამინდელი დირექტორი ნინო ჩივაძე საგვარეულო შტოში მეხუთე თაობას წარმოადგენს და სკოლის ნოვატორულ ტრადიციას განაგრძობს.

დებატების კლუბმა სკოლის მოსწავლეებს კიდევ უფრო მეტი ასპარეზი გაუხსნა. ყოველკვირეული ტრენინგები, ეროვნულ თუ საერთაშორისო ტურნირებში გამარჯვება მოსწავლეებისთვის მოტივაციასთან, ახალ წარმატებებთან ერთად, აუცილებლობაც გახდა. დებატების კლუბის 20 წლიანი არსებობის შემდეგ კი დებატები, როგორც სავალდებულო საგანი სასკოლო კურიკულუმშიც გაჩნდა. „2018 წლიდან ჩვენს სკოლაში დებატები როგორც სავალდებულო საგანი ისე ისწავლებოდა.  დებატების დანერგვა საგანმანათლებლო სივრცეში, მართლაც ძალიან პროგრესული და საინტერესო ნაბიჯი იყო. ეს არის საგანი, რომელიც ანვითარებს მოსწავლეებში კრიტიკულ აზროვნებას, ლოგიკურ და არგუმენტირებულ მსჯელობას “, – განაცხადა სკოლის დირექტორმა ნინო ჩივაძემ.

„აშკარა და  შესამჩნევია მოსწავლეებში  აზრის ჩამოყალიბებისა და სიტყვით გამოსვლის უნარის განვითარება. სამუშაო შეხვედრების წყალობით ბავშვები არა მარტო დებატის ტექნიკას სწავლობენ, არამედ   მეტად თავდაჯერებული და თავისუფლები  ხდებიან. ამჟამად კლუბში 20 ახალბედა მოსწავლეა გაწევრიანებული, არიან უკვე გამოცდილი, ძველი კლუბის წევრებიც.”   

 

თბილისის ჯამბულ წურწუმიას სახელბის N94 საჯარო სკოლის ქართული ენისა და ლიტერატურის პედაგოგი, ლელა ტალახაძე დებატების კლუბს 2020 წლიდან ხელმძღვანელობს და წელს  უკვე დებატების ტურნირის მსაჯის სტატუსიც მოიპოვა.  ეს წარმატება მისთვის განსაკუთრებით სასიხარულო და სტიმულის მიმცემია.

 

პანდემიით, დისტანცირებული სასწავლო პროცესით და დებატების კლუბის საქმიანობაში დროებითი შესვენებით გამოწვეული დაბნეულობა  ლელასთვის და მისი მოსწავლეებისთვის ერთმა სატელეფონო ზარმა შეცვალა. „მარტის თვიდან, როდესაც პირველი მეცადინეობები უნდა ჩაგვეტარებინა, დაიხურა სკოლები. მსოფლიომ და მასთან ერთად საქართველომ სხვა რეალობაში გაიღვიძა. ძალიან გულდაწყვეტილი ვიყავი, ვერც წარმომედგინა როგორ შეიძლებოდა საქმის გაგრძელება, ჩავთვალე, რომ ყველაფერმა დაკარგა აზრი. თინათინ ცერცვაძის მოულოდნელმა  სატელეფონო ზარმა ყველაფერი ერთ წამში შეცვალა“,-აღნიშნა პედაგოგმა. საქართველოს დებატებისა და განათლების ინსტიტუტის ხელმძღვანელის შეტყობინება, რომ კლუბი ახალ რეალობაში, სრულიად სხვა შესაძლებლობებით უპრობლემოდ შეძლებდა მუშაობის გაგრძელებას განსაკუთრებით საიმედო და სასიხარულო აღმოჩნდა. „ონლაინ-პლატფორმების დახმარებით  სამუშაო  შეხვედრები წამოვიწყეთ, გავმხნევდით ჩვენც და გავამხნევეთ ბავშვებიც, რომლებიც ჩვენზე არანაკლებ დაბნეულები იყვნენ შექმნილი სიტუაციის გამო“.

ლელა ტალახაძეს მოულოდნელმა ცვლილებამ ბავშვობის საინტერესო ისტორია გაახსენა – „რამდენიმე დღის განმავლობაში გონებაში ჩემი ბავშვობის მოგონება  მიტრიალებდა. მახსოვს ერთ დღეს მამა სამუშაოდან ძალიან დაღლილი და დამწუხრებული დაბრუნდა ( მამა მემანქანე იყო), სამზარეულოდან მის სიტყვებს მოვკარი ყური –  „მატარებელი დიდი სიჩქარით გამომექცა დაღმართზე და  შეჩერება სასწაულით მოვახერხე, კიდევ კარგი რელსებიდან არ გადამივარდაო“,- თავს იმშვიდებდა ხიფათს გადარჩენილი. „რა მოხდებოდა რელსებიდან რომ გადავარდნილიყო“ -მეთქი, -ჩავეძიე მამას.  „არა, არ შეიძლება, მატარებელი რელსებიდან არ უნდა გადაგივარდეს, თორემ დიდი უბედურება მოჰყვებაო“,- ამიხსნა მარტივად. მე მაშინ მაიცდამაინც ვერ გავიგე რატომ იყო უბედურება, მაგრამ  მარტის ამ მძიმე დღეებში, რატომღაც სწორედ ეს მახსნდებოდა და ჩემს წარმოსახვაში ვიმეორებდი: აი, მამა, არც ჩვენ გადაგვივარდებაა მატარებელი  რელსებიდან -მეთქი. პროექტში დებატები უკეთესი განათლებისთვის ყოფნა, ყოველდღიურად მაძლიერებდა და ამყარებდა ამ ჩემს რწმენას, რომ ჩვენ არავითარ შემთხვევაში არ დაგვატყდებოდა თავს უბედურება. ასეც მოხდა, მე არამხოლოდ დებატების კლუბი გავხსენი, გავააქტიურე და მყარი ნავსაყუდელი გავუჩინე ჩვენს ახალგაზრდებს, არამედ გასაოცარი წინსვლა გავაკეთე ჩემს პროფესიულ და პიროვნულ განვითარებაში.”

 

მას პედაგოგობას ჯერ კიდევ სკოლის ასაკიდან უწინასწარმეტყველებდნენ, რაზეც მაშინ ეცინებოდა და  სამსახიობო კარიერისთვის ემზადებოდა. მაგრამ გავიდა წლები და ფოლოლოგიური განათლების მიღების შემდეგ რედაქციის და სტამბის ნაცვლად 94-ე საჯარო სკოლაში აღმოჩნდა. პირველმა შეხვედრამ ბავშვებთან და პირველმა ბავშვურმა ემოციებმა ყველაფერი შეცვალა. „შეუდარებელი იყო პირველი ემოციები, ბავშვების  მეტყველმა თვალებმა, რომლებიც ისე შემოგყურებენ, თითქოს ღმერთი იყო და შენგან სასწაულს ელოდნენ,  ისე დადებითად დამმუხტეს, რომ მას შემდეგ აღარასდროს მიფიქრია სკოლიდან წამოსვლაზე და, რომც მეფიქრა, ვერ დავთმობდი მათ სიყვარულს.“- განაცხადა ლელამ.

მას შემდეგ დღემდე სსიპ თბილისის ჯამბულ წურწუმიას სახელბის  N 94 საჯარო სკოლის ქართული ენისა და ლიტერატურის პედაგოგია, უკვე წამყვანის სტატუსით, სასკოლო საქმიანობაში აქტიურად ჩართული და არაერთი პროექტისა თუ  აქტივობის ინიციატორი და მონაწილე.

2020 წელს დებატების კლუბის გახსნა ერთ-ერთი წარმატებული გადაწყვეტილება აღმოჩნდა. „აშკარა და  შესამჩნევია მოსწავლეებში  აზრის ჩამოყალიბებისა და სიტყვით გამოსვლის უნარის განვითარება. სამუშაო შეხვედრების წყალობით ბავშვები არა მარტო დებატის ტექნიკას სწავლობენ, არამედ მეტად თავდაჯერებული და თავისუფლები  ხდებიან. ამჟამად კლუბში 20 ახალბედა  მოსწავლეა გაწევრიანებული, არიან უკვე გამოცდილი, ძველი კლუბის წევრებიც.“- განაცხადა ლელა ტალახაძემ.

 

 

„ჩვენი დებატკლუბის მოსწავლეების მიღწევები იმდენად მაღალია, მთელი საქართველოს მასშტაბით, რომ ყოველწლიურად ერთი მოსწავლე მაინც მიდის საერთაშორისო ფორუმზე ამერიკული აკადემიიდან“ – გივი ზალდასტანიშვილის სახელობის ამერიკული აკადემიის დირექტორი ანდრეს ხ. კრუზი დებატების კლუბის 20 – წლიანი ისტორიის შესახებ

გივი ზალდასტანიშვილის სახელობის ამერიკული აკადემია თბილისში ერთ-ერთი პირველი სკოლაა, სადაც დებატების კლუბი დაარსების დღიდან გაიხსნა და 20 წლიან ისტორიას ითვლის.

აკადემია, რომელიც აშშ-ს სახელმწიფო დეპარტამენტის გრანტით და სამეურვეო საბჭოს ფინანსური მხარდაჭერით შეიქმნა, თავიდანვე მოწოდებული იყო შეესრულებინა სანიმუშო სკოლის როლი ქვეყანაში მიმდინარე საგანმანათლებლო რეფორმის პროცესში, რაც გულისხმობდა სწავლების მეთოდების თანამედროვე ინტერაქტიური მეთოდოლოგიით შეცვლას, კრიტიკული ანალიზის, წერითი უნარ-ჩვევებისა და შემოქმედებითი აზროვნების დამკვიდრებას სასწავლო პროცესში.

როგორც აკადემიის დირექტორი ანდერს ხ. კრუზი აღნიშნავს, დებატების კლუბის ჩამოყალიბება, მნიშვნელოვანი მოვლენაა აკადემიისთვის, რადგან მოსწავლეებს უყალიბდებათ ის აუცილებელი უნარები, რაც შემდგომში უკვე მათი წარმატების საწინდარია ნებისმიერ სფეროში, სკოლაში აკადემიური მოსწრებით დაწყებული, ამა თუ იმ პროფესიის გზის არჩევით დამთვარებული.

„მიღწევები იმდენად მაღალია ჩვენი დებატკლუბის მოსწავლეების, მთელი საქართველოს მასშტაბით, რომ ყოველწლიურად ერთი მოსწავლე მაინც მიდის საერთაშორისო ფორუმზე ამერიკული აკადემიიდან“ – განაცხადა ანდერს ხ. კრუზმა. მისივე თქმით, აღსანიშნავია, ამერიკული აკადემიის მოსწავლეების წარმატება რეგიონულ და ნაციონალურ ტურნირებშიც, რის შემდგომაც მოსწავლეებს ეძლევათ უნიკალური შანსი საერთაშორისო ასპარეზზე გასვლის.

განსაკუთრებულ აღნიშვნას საჭიროებს ის უკუკავშირები, რასაც ჩვენ ვიღებთ ამერიკული აკადემიის დებატკლუბის წევრი იმ მოსწავლეებისაგან, რომლებიც გვიზიარებენ, თუ როგორი დიდი როლი ითამაშა დებატების კლუბის წევრობამ მათი წარმატებების მიღწევაში  ევროპისა და ამერიკის ისეთ უმაღლეს სასწავლებლებში, როგორიცაა ჰარვარდი, ვესტ პოინტი, იელი, და სხვა.

დებატების კლუბში მიღებული განათლება და ცოდნა ყოველწლიურად 20-მდე ახალი კურსდამთავრებულისთვის ქმნის უდაო  წარმატების საფუძველს.

გარდა ამისა, ამერიკული აკადემიის მასწავლებლები ხშირად აღნიშნავენ იმ უპირატესობებს, რაც დებატკლუბის მოსწავლეებს აქვთ აკადემიურ სწავლებაში კლუბში გაწევირანების შემდეგ.

აკადემიის 20 წლიანი  ისტორიის მანძილზე დებატების კლუბს განსაკუთრებული დატვირთვა მსოფლიოში არსებული საზოგადოებრივ-პოლიტიკური დღის წესრიგიდან გამომდინარეც აქვს.

„ადამიანები სწავლობდნენ და ასწავლიდნენ დებატებს ჯერ კიდევ ანტიკურ სამყაროში. დებატები ავითარებს ძალიან ბევრ უნარს, ეს უნარები ყოველთვის ძალიან მნიშვნლოვანი იყო. ვფიქრობ, ჩვენ გადავდივართ იმ მსოფლიო წესრიგში, სადაც ხალხს არ სურს სხვისი აზრის მოსმენა, ეს ტენდენცია განსაკუთრებით იკვეთება ქართულ პოლიტიკაში, სადაც იშვიათად ვისმენთ დებატს ან დიალოგს. ადამიანები აფიქსირებენ საკუთარ პოზიციას ისე რომ არ უსმენენ ერთამნეთს. მიმაჩნია რომ აზრის ჩამოყალიბებასთან ერთად სხვა ადამიანის მოსმენის კულტურა გადამწყვეტია“, – განაცხადა გივი ზალდასტანიშვილის სახელობის ამერიკული აკადემიის დირექტორმა ანდერს ხ. კრუზმა.

მთელი საქართველოს მასშტაბით ჩართული ჩვენი დებატების კლუბების სკოლის დირექტორებთან შეხვედრამ ყველანაირ მოლოდინს გადააჭარბა.

ასეთი წარმატებული და გულშემატკივარი სკოლების მაგალითებზე დავინახეთ, თუ როგორი დიდი მნიშვნელობა აქვს სკოლის ხელმძღვანელების, ადმინისტრაციისა და ზოგადად სკოლის ჩართულობას და მხარდაჭერას დებატების კლუბების და მთლიანობაში მომავალი თაობის განვითარებისთვის.

განსაკუთრებული მადლობა ჩვენს სტუმრებს